XXI. mendeko euskararen historia soziala herri-mailan
Euskaltzaindiak jotako erronkari aurre egiteko, ikusizko erreportaje bat egin beharko duzue. Erreportaje horren gaia honakoa izango da: orain arte euskarak herrian egin duen ibilbidea kontuan hartuta, zein egoeratan nahiko genuke etorkizun hurbilean?
Era berean, baliagarri izango zaizkizuenez, zeharka jorratu beharko dituzue ikerketa-ildoetatik jasotako ekarpenak:
- Zein politika erabiliko dugu egoera horretara iristeko?
- Nola kudeatuko ditugu gure arteko aldarrikapenak?
- Zein ezaugarri ditu XXI. mendeko euskal hiztunak?
- Zein hizkuntza behar asetuko ditugu?
- Nola eta zergatik islatuko dugu aniztasun hori?
3.1. Erronkaren eskakizunak berreskuratu
Jaso itzazue erronkaren eskakizunak Taldearen koadernoan; horretarako, azter ezazue Euskaltzaindiak jotako erronkari aurre egiteko gauzatu beharreko ekintza komunikatiboari dagokion egoera.
3.2. Eredua aztertzen
Aurrera egin aurretik, eredu baten azterketa egingo duzue. Horretarako, Zingizango elkarteak Legazpiko euskararen gainean egindako erreportajea aztertuko duzue. Ondoren, taldean ekintza komunikatibo horren osagaiak bilduko dituzue, eta testu horren egitura edo plan orokorra aterako duzue Taldearen koadernoan.
3.3. Planifikazioa: plan orokorra
Eredutik abiatuta, zereginari erantzungo dion erreportajearen egitura edo plan orokorra adostuko duzue. Horretarako, Taldearen koadernoan duzuen taula izango duzue abiapuntu eta, hori erabiliz, erreportajearen planifikazioa egingo duzue, elkarren artean eztabaidan arituz. Erreportajearen edukia hautatzerakoan, ezinbesteko izango zaizue bateratze-saioetan jasotako informazioa.
3.4. Ekintza komunikatiboa gauzatzen (I)
Aurreko jardueran, egingo duzuen erreportajearen egitura landu duzue. Adostutako plan orokor hori aintzat hartuta, bakoitzak gidoiaren proposamena idatziko du Gogoeta-kaieran. Bukatzean, gutxieneko honako ezaugarriak bete dituzuela ziurtatu beharko duzue:
- Eskatutakoari erantzuten dion testua da.
- Soziolinguistika-kontzeptuak erabili ditut.
- Gainerako taldeetako informazioa egoki txertatu dut lanean.
- Ekintza komunikatiboari arrakastaz erantzuteko estrategiak erabili ditut: (ahots desberdinak, egitura eraginkorra eta logikoa).
3.5. Ekintza komunikatiboa gauzatzen (II)
Zuetako bakoitzak idatzi duen gidoian oinarrituta, azken bertsioa adostuko duzue Taldearen koadernoan eta ikusizko erreportajea prestatzen hasiko zarete. Horretarako, ikerketa bakoitza burutzean jasotako informazioa biltzen duten karpetetan jasotako informazioa baliagarri izango zaizue (grabaketak, irudiak, argazkiak…).
Bukatzean, gutxienez, honako ezaugarriak bete dituzuela ziurtatu beharko duzue:
- Eskatutakoari erantzuten dion testua da.
- Soziolinguistika-kontzeptuak erabili ditugu.
- Gainerako taldeetako informazioa egoki txertatu dugu lanean.
- Ekintza komunikatiboari arrakastaz erantzuteko estrategiak erabili ditugu: (ahots desberdinak, egitura eraginkorra eta logikoa).
3.6. Ekintza komunikatiboa gauzatzen (III)
Ikusizko erreportajea gauzatuko duzue, eta, ondoren, egindako lanaren esteka txertatuko duzue Taldearen koadernoan. Ikusizko erreportajea egiteko, bideo editore bat, edota aurkezpenak egiteko aplikazioren bat erabili beharko dute ikasleek (Prezi edota Powtoon bezalakoak, esate baterako).
Horretaz gain, lanaren bukaeran agertu beharreko kredituak osatuko dituzue. Atal honetan, erabilitako irudien eta argazkien jabetza eta erabilitako musikaren iturriak aipatuko dituzue, gutxienez.
Azkenik, Gogoeta-kaieran, erronka egiteko Euskaltzaindiak egindako galderari emandako erantzuna berreskuratuko duzue, eta egindako lanketa kontuan izanda, eman zenuten erantzuna molda ezazue ahozko grabaketa bat eginez: zein ekarpen egin diezaioke gutako bakoitzak euskarari? Ahozko erantzuna editatu behar izanez gero, erabil ezazue audio editoreren bat.